Astrologie

D Astrologii (altgriech. ἄστρον, astron, „Stärn“, λόγος, logos, „Leer“ - Stärndütig) isch d Dütig vo astronomische Eräigniss und Stärnskonstellazione in Bezug uf irdischi Verheltniss und Vorgäng. Näbe dr „westlige“ Astrologii, wo hüte vor allem in Öiropa und Amerika verbräitet isch, si au die chinesischi und die indischi oder vedischi Astrologii bedütend.

Die westligi Astrologii het iiri Ursprüng in dr vorchristlige Zit z Babylonie und Egüpte. Im hellenistisch brägte griechisch-egüptische Alexandria het si iiri Dütigs- und Berächnigsgrundlaage überchoo, wo mä in Grundzüg au hüte no gseet. D Astronomii as dütigsfreiji Beobachdig und mathematischi Erfassig vom Stärnehimmel isch us ere uusegwaggse, und isch lang für d Astrologii e Hilfswüsseschaft bliibe.

In Öiropa het d Astrologii e Gschicht voller Wäggsel. Wo s Christedum im Römische Riich zur Staatsreligion worde isch, isch si bekämpft und ins Absits drängt worde. Im spooten Middelalter het si aber wider an Reputazion gwunne, und vo dr Rönessans bis zum 17. Joorhundert isch si en anerkennti Wüsseschaft gsi. Mit dr Ufkläärig het si denn in bildete Kräis iiri Plausibilidäät verloore. Erst um 1900 isch wider en ärnsthafts Inträssi an dr Astrologii ufchoo, und sit de spoote 1960er Joor, isch si mit dr New Age-Beweegig in dr westlige Hemisfääre wider seer populäär worde.

D Wüsseschaft luegt d Astrologii hüte vor allem us ere religionswüsseschaftlige und kulturhistorische Perspektive aa. Mä het aber au empirischi Studie gmacht, und s Resultaat vo dene allne isch gsi, ass überbrüfbari Ussaage vo Astrologe statistisch nit signifikant besser zuedräffe as willkürligi Behauptige.